Joker is Dead

Alam ba ninyo na si Heath Ledger ang gumaganap na Joker sa bagong Batman? Siguro alam na ninyo kung nabasa ninyo ang article sa pagkamatay ni Heath. Sobra namang bata, bente-otso, ni Heath para mamatay agad at meron pang agam agam na suicide iyun dahil sa sleeping pills na nakita sa tabi niya. Nabasa ko nga ang isang comment doon sa news entry na iyun na akala niya mauuna pang mamamatay si Britney Spears. Buhay talaga, di mo masisiguro kung kelan matatapos.

Pero naisip ko, ok ba tapusin ng isang tao ang buhay niya? Nabasa ko yata na kaya nagpakamatay si Marilyn Monroe at James Dean dahil sa ayaw nila makita iyung pagtanda nila. Iyung drugs o substance use ay means lang, pero di iyun ang reason talaga. Siguro gusto nila na nandoon pa rin ang kagandahan ng kanilang kabataan pag ipinasok sila sa ataul nila. Ayaw nila na makita sila ng fans nila na kulubot ang balat. Ganoon din kaya ang reason ni Heath?

Balik tayo kay Britney muna. Weird pero narinig ko na sinabi ni Mo Twister na dapat di buntis si Britney. Maawa daw si Britney doon sa pinagbubuntis niya. Ganoon ba kasama si Britney bilang ina? At iyun nga meron pang nag wiwish na sana siya na lang iyung unang namatay. Nakakatawa, iyung mga gusto ng mga tao na mamamatay ayaw mamatay. Pero iyung di inaasahan eh iyun pa ang natetepok. Ganyan ba talaga? Iyung mga masamang damo mahirap mamamatay?

Sana mag rest in peace na si Heath. Idol ko siya doon sa “A Knight’s Tale”. Napaka-cool niya doon, napaka maharlika na medyo naughty pero may pagka torpe. Sayang talaga.

Sana maging matagumpay ang Batman. Sana for once, MATALO NI JOKER SI DARK KNIGHT. Posible naman iyan di ba? Si Superman nga eh namatay. Oo nga pala, sa cartoons, napatay ni Freeze si Batman. Hehehe.

Uniform

Balik uniform na naman kami pero ako di pa rin nag uuniform. Ganyan talaga siguro pag sadyang matigas ang ulo mo ng ipinanganak ka, tapos kung ilang beses pa nabagok ulo mo dahil sa kalikutan at kakulitan. (Meron bang kaibahan ito?)

Noong maliit pa kasi ako (kuwento ng mga magulang ko) ay nahulog ako sa isang balong malalim (Meron bang balong mababaw?) at nahampas ang ulo ko sa gilid nito. Ayun, isang mala-Harry Potter na scar iyung remembrance sa akin ng insidenteng iyun.

Meron ding isang beses na akala ko iyung inaakyat ko isang matibay na puno. Ginawa ko kasing taguan iyun sa larong baril-barilan. Mantakin mo na bumigay iyun at ulo ko ang ginawa kong panangga sa matigas na lupa. Noong tumingala ako, puno pala ng papaya iyung inakyat ko.

Isa pang kahindik-hindik na nangyari ay ng tumatakbo ako sa daan at naapakan ko ang balat ng saging. Walanghiya, totoo pala iyung mga nakikita ko sa TV na madudulas ka pala talaga doon. Ayun to see is to believe talaga. Doon yata talaga ako nakakita ng mga istars.

Hahaha. Intro pa lang iyan kung bakit matigas ang ulo ko. Pero di kaya nakuwento ko na iyan dito? Hala ka, matigas na ang ulo may amnesia pa.

Balik sa uniform. Di talaga kasi ako sanay mag-uniform at wala akong makitang rason para kelangan mag-uniform. Sabi nila tipid daw sa damit. Palagay natin matipid nga eh bakit naman ako kelangan magtipid eh marunong din naman ako maglaba. Meron pang laundry shop sa baba namin. Eh kung may topak nga ako, meron akong recycling plant ng damit sa bahay eh.

Sabi daw nila iyung uniform ay nagbibigay sa amin ng kagalang galang na image. Napatawa ako dito ah. Totoo siguro sa image pero sa kaloob-looban, ewan ko na lang. Kahit siguro na balutin ka ng ginto pag bulok naman ang loob eh mahahalata pa rin. Mangangamoy ka kaya. Siguro kaya gusto nila mag-uniform para sabihin na merong pagkakaisa. Para bang ang dungis ng isa ay nakashare sa lahat.

Ayoko nga mag-uniform. Nawawala kasi karakter ko eh. Di ako mahusay magsuot ng long islib, slacks at balat na sapatos. Mas lalo na ang mag-barong. Pag nagsusuot ako niyan, di ako mapakali. Pawisin pa naman ako. Di nga ako nagjajaket pag umuulan eh. At saka sa trabaho ko, di bagay mag-uniform. Di naman ako humaharap sa kliyente eh.

Isa pang dahilan kung bakit ayoko mag-uniform eh dahil di nasunod iyung sukat ko. Mantakin mong nagpasukat pa kami sa isang tailor para nga tailor-fit ang uniform. Nang dumating eh naging small, medium at large ang mga damit. Eh alam naman ninyo na payatot ako kaya kapag suot ko iyun para akong hip hopper. Bahala sila diyan. Natatawa na lang ako pag may makitang ka-opisina na pormang alam niyo na.

Last week, sinita ako dahil wala daw ako uniform. Sabi ko na lang naiwan sa probinsiya. Sige bigyan nila ako ng pamasahe kunin ko iyun. Hintayin ko na lang maibigay ang clothing allowance para makabili ng “kagaya” ng uniform namin. As of now, patigasan na lang, hanggang magkaroon ng memo. Matagal tagal na rin na di ako sumasagot sa memo eh.

Match Maker

Pasensiya na at ngayon lang ulit ako nakapagpost. December kasi kaya busy. Paano eh talaga namang nakakatamad ang buwan na ito. Maliban sa malamig, puro party ang inaatupag. Kung hindi ka lasing, tulog ka naman parati. Pero meron talaga akong pinag kakaabalahan nitong nakaraang buwan. Isa na dito iyung match-making activities ko.

Match-making, hindi iyung taga gawa ng posporo ha. Iyun bang tulad ng dating service dito sa internet. Kaso walang bayad at merong update. Ang importante lang kaibigan ko pareho para madali i-build up ang bawat isa. Bakit ko naman naisip na mang match ng mga kaibigan? Paano kasi, gusto ko lahat maligaya, at maganda iyung sa pagpasok ng taon eh meron kang kayakap hanggang Valentines day.

Kaso meron akong isang kaibigan na ikinuwento ang aking extra-curricular activity. Ayun meron na namang isang nagpapahanap sa akin na loveless and looking. Hay sana ganoon lang kadali. Pero mahirap ah. Dapat alam mo ang gusto ng bawat isa. Dapat alam mo ang karakter ng isa’t isa. At saka mahirap iyung may pressure na galing sa ibang tao. Ako pa naman pag pinipressure mas lalong nagiging stubborn.

Kunsabagay, iniisip ko rin nakakadagdag gawain ito. Tama na may napaligaya akong isang pares. Wala na nga akong time sa pag boblog eh, dagdagan ko pa nito. Hindi naman sa tumatanggi ako,kaso alam ko ang aking limitasyon. Siguro gawin ko na lang seasonal ito. Tuwing December ko lang gagawin ang match-making. Kaya close-shop na ako ngayon.

Sa December na lang ulit.